"હું તો પહેલેથીજ જાણતો હતો કે આ બધા રંગ-ઢંગ સારા નથી.એની લાઈફ સ્ટાઈલ નથી જોતા ?નવાબ જેવો પાનનો શોખ.પાનવાળાને ત્યાં પણ મોદીની દુકાનની જેમ ખાતું.ક્યારેક તો ભાંડો ફૂટેને ?"

બીજો કુદયો,"શુ જ્યોતિબેનને આ બધી ખબર નહિ હોય ?ઇ તો બિચારા ભગવાનનું માણસ છે."

ટોળામાંથી કોઈ એ જવાબ આપ્યો" એવું થોડું બને ધણી બેંક માંથી ઉચાપત કરે અને બૈરીને ખબર પણ ન હોય "?

અરે ભાઈ સાંઠ-ગાંઠ હોય જ "

પાછળથી કોઈ બોલ્યો "ઝાલાભાઈ એવા લાગતા નહોતા,પણ વિનાશ કાળે વિપરીત બુદ્ધિ"

કોઈ પીઢ વચ્ચે ટપકયા,"પાપનો ઘડો ભરાય ત્યારે ફૂટે, કોને ખબર છે જૂનાગઢથી બદલી અહીં કેમ થઈ હશે,ત્યાં પણ ટોપી ફેરવી હશે"

****

ભાવનગરના શાસ્ત્રીનગરના પોશ ઇલાકામાં મુખ્ય રસ્તા ઉપર આવેલ L/135 નંબરના મારા ટેનામેન્ટની બહાર લગભગ 1500 મકાનો ધરાવતી કોલોનીના મોટાભાગના લોકો ઉમટી પડ્યા,અને ઘરની સામે મોટું ટોળું ઉપર મુજબની ચર્ચા કરતા ઘરની અંદરની હિલચાલ કુતુહલતા પૂર્વક નિહાળતા હતા.

***

શનિવારનો દિવસ હતો.સાંજના છ-સાડા છ નો આરસો હતો.ત્યાં ઘર પાસે પોલીસની જીપ આવી ઉભી.જીપમાંથી પોલીસ ઇન્સ્પેક્ટર ઉતરી મારા ઘરમાં પ્રવેશ્યા.

બસ,પછી તો પૂછવુજ શુ ?તમાસાને તેડું હોય ? ધીમે ધીમે ઘર પાસે કુતૂહલતા પૂર્વક કોલોનીના લોકો ભેગા થવા માંડ્યા.

કોઈએ રેડ પડયાની વાત ચલાવી,તો કોઈએ બેંક માં કેશિયર હોવાને નાતે ઉચાપત કર્યાની ચર્ચા જોરશોરથી શરૂ કરી.

હું તથા મારા પત્ની મુકભાવે આ બધું જોતા હતા.પણ લાચાર હતા.

***

વાત એમ હતી કે એ સમયે ભાવનગરમાં સીટી ઇન્સ્પેક્ટર તરીકે સ્વ.મુ.કનકભાઈ નાણાવટી હતા.તેઓ અમારા જૂનાગઢના પડોશી તો ખરાજ ઉપરાંત મારા સ્વ.પિતાશ્રીના વિદ્યાર્થી પણ હતા.એટલુંજ નહિ પણ એમના પત્ની સ્વ.ઉષાબેન પણ મારા પિતાશ્રી પાસે જૂનાગઢમાં ભણી ગયા હોય અમારે ઘરજેવો સબંધ હતો.અચૂક દર પંદર દિવસે અમારે સહ પરિવાર એમને ઘરે જવાનું,અને રાત્રી ભોજન પતાવીને જ પાછું ફરવાનું.

તે દિવસે મુ.કનકભાઈ નજીકના ગામ વરતેજ ખાતે કોઈ ખૂન કેસની તપાસ માટે ગયા હતા.અને પાછા ફરતા મારી કોલોની રસ્તા માંજ આવતી હોય ,તેઓ મળવા,અને બેસવા આવેલ.પરંતુ ડયુટી ઉપર ગયા હોય,તેઓ ફૂલ યુનિફોર્મ માં હતા.તેથી લોકોને જુદો જુદો વહેમ પડ્યો,અને ઘર પાસે તમાશો યોજાયો.નાસ્તો-ચા પતાવી મુ કનકભાઈ જવા ઉભા થયા,ત્યારે મારી પીઠ ઉપર ધબ્બો મારી વિદાય લીધી ત્યારે મેં મુ.કનકભાઈને હાથ જોડીને વિનંતી કરી કે "સાહેબ,આપ ગમે ત્યારે ખુશીથી પધારજો પણ મહેરબાની કરી સિવિલ ડ્રેસ માં આવજો,આ તમારા યુનિફોર્મે મને વગર કારણે કોલોની માં બદનામ કરી મુક્યો.

મુ.કનકભાઈ હસી પડ્યા અને જવાબ આપતા કહ્યું." હું રોડ ઉપરથી શેરીમાં વળ્યો ત્યાંજ કોલોની વાળા ભેગા થઈને જોતા હતા કે પોલીસની જીપ ક્યાં ઉભે છે,તારી વાત સાચી છે.તમાસાને તેડું ન હોય.

આમ કહી હસતા હસતા છુટ્ટા પડ્યા,એ દ્રશ્ય જોઈ કોલોનીના લોકો ધીમે ધીમે વિખરાવા લાગ્યા.

"