" કર્યા ભોગવવાના છે "

કંકુ મા એક વાર માળીએ થી છાણા ઉતારતા સીડીનું પગથીયું ચુકી ગયા અને નીચે પડ્યા.પગે સોજો આવી જતા તેઓ દવાખાને બતાવવા દાકતર પાસે ગયા.

દાક્તરે તપાસી એક્ષ -રે પણ લીધો ને નિદાન કર્યું કે ગોઠણ ની નીચેનું હાડકું ભાંગી ગયું છે .

કંકુ મા ને દવાખાનામાં દાખલ થવું પડ્યું .

 કંકુ મા ભલે એકલા પણ તેનું "ડોશી સખી -વૃંદ " અને હિત વાન્છું સખીઓ ઘણી .તેની સહેલીઓ ખબર કાઢવા દવાખાને  રોજ આવતી  થઇ ગઈ.

એક વાર કંકુ માના ખબર કાઢવા સખીઓનું ટોળું એક સામટું આવી ગયું. 

તેમાં ગંગામા ચાર ચોપડી ભણેલ હતા અને બધી સખીઓમાં "જ્ઞાન વૃદ્ધ " હોવા સબબ આદરણીય હતા  તે પણ આવ્યા "એલી કંકુ શું થઇ ગયું તને ? ગંગામા એ દવાખાનાના વોર્ડમાં દાખલ થતા વેંત જ પૂછ્યું ,પડી અને સોજો આવ્યો તેમાં દવાખાને શું આવી ? મારો રાજુ ઓટલે થી ગબડ્યો, અને પગે સોજો આવ્યો એટલે હળદર મીઠાનો ગરમ લેપ બે દિવસ લગાડ્યો, અને સોજો ઉતરી ગયો ?

કણસતા અવાજે કંકુમાં બોલ્યા " ભઈ,આતો હાડકું ભાંગી ગયું છે તેમ દાક્તરે કહ્યું "

ગંગામાં એ જવાબ આપ્યો " કંકુ, આજકાલ ના લવરમુછિયા દાક્તરો ને કઈ ખબર નથી પડતી , આપણા જમાના જેવા દાક્તરો અત્યારે  થોડા છે ? આ શું છે ? તારા પગનો ફોટો છે ?"  એમ કહી તેણે બાજુના નાના ટેબલ ઉપર પડેલ -એક્ષ રે ઉપાડી, થોડે દુર રાખી, જીણી આંખે જોયો. નિષ્ણાત તબીબ ની અદાથી ફોટો જોયા પછી ગંગામાં બોલ્યા " અરે કંકુ આ તારા પગ નો ફોટો છે ? આમાં તારો  પગ તો ક્યાય  દેખાતો નથી ? બીજી સખી ગોદાવરી બેન ને ફોટો બતાવતા ગંગામાં  બોલ્યા "અલી ગોદી, જો, આ ધોળું ધોળું દેખાય છે તે બધું રસી  છે પગ પાકી ગયો છે કંકુ ના પગ આવા ધોળા નથી નક્કી હવે કંકુ નો પગ જ કાપવો પડશે કંકુ, ધ્યાન રાખજે આ મૂવા દાક્તરું પીટ્યા તારો ક્યાંક પગ ન કાપી નાખે . આખા પગ માં રસી જ છે  "

કંકુમાં ફરી કણસતા અવાજે બોલ્યા " ભાઈ, જે કરમ માં હશે તે થશે બીજું શું ?"

ગંગામાં એ જવાબ વાળ્યો , " હા સાચું પરોણો ને પશુ ,ઘરધણી ને વસુ  ",   ઈમ દવાખાનાનો દર્દી તે દાકતર ને વસુ  "

ખાસ્સો  સમય કંકુમાંને સલાહ દીધા પછી ગંગામાં ઘેર જવા ઉભા થયા જતા જતા ફરી બે શબ્દ ઉમેર્યા 

" અલી કંકુ ,ઘર ની ચિંતા ન કરતી અત્યારે અને પછી પણ અમે બધા  બેઠા જ છીયે. મારો વા'લો બધું 
સારું કરી જ દેશે ,તારી ઉમર કઈ જવા જેવડી નથી તેમ છતાં,તૂટી ની કોઈ બુટી નથી  તેડું આવ્યું હોય તો તેને કોઈ થોડું  રોકી શકે છે ?  સુખેથી ચિંતા વિના જવું બાકી તો કર્યા  ભોગવવાના છે "

એમ કહી ને કંકુમાં ના અંગત સખી ગંગામાં વિદાય થયા ..





કેટલીકવાર પોતાની જાતને વધુ ડાહ્યા,ચતુર,અને હોશિયાર માનતા માણસો "બાફી મારતા " હોય છે.પોતાનું ડહાપણ અને વાક્ચાતુર્ય બીજા પાસે પ્રદર્શિત કરતાં પોતે શું બોલે છે અને બોલ્યાનો શું અર્થ થાય છે તેની તેને પોતાને પણ ખબર નથી હોતી આજે એવું એક ઉદાહરણ રજૂ છે.