ઓગણીશમી સદીના બીજા દાયકાના ઉતરાર્ધ ની આ વાત છે.
એ વખતે પણ  જૂનાગઢની બહાદુરખાનજી હાઈ સ્કૂલના વિશાલ પટાંગણમાં આજે જર્જરિત હાલતમાં  હયાત છે, તે સમયે  યુવાવસ્થા ભોગવતો  એજ ઘટાટોપ પીપળો અભ્યાસમાં રસ-રુચિ ન ધરાવતા વિદ્યાર્થીઓનું મોસાળ હતો.
ન ગમતા વિષયો કે શિક્ષકોના પિરિયડ છોડીને લગભગ આઠ દશ વિદ્યાર્થીઓ તો ત્યાં અડિંગો જમાવીને બેઠા જ હોય.અને તે પણ શાળા છૂટ્યા સુધી કદાચ અમુક વિદ્યાર્થીઓ એમાં બદલાતા રહે પણ પીપળો વાંઝીયો  ન રહે
એક દિવસ એ રીતે થોડા વિદ્યાર્થીઓ ગપ્પા મારતા  બેઠા હતા એ પૈકી એક વિદ્યાર્થી પ્રવિણે એમના મિત્રો સાથે વાતસર વાતમાં કહ્યું કે " ક્લાસ ન ભરીને અહીં પીપળે બેસનારા બધાજ વિદ્યાર્થીઓ બોદા અને ઠોઠ હોય છે એવી શિક્ષકોની માન્યતા ખોટી છે. હું એ સાબિત કરી શકું એમ છું "
સામાન્ય રીતે બધાજ "પીપળા સદસ્ય "  પ્રવિણને ખુબ સારી રીતે ઓળખે અને એની છાપ ગપ્પોડીની પણ ખરી તેથી અન્ય વિદ્યાર્થીઓ પૈકી કોઈએ એને પૂછ્યું " એ કેવી રીતે ?"
પ્રવિણે કહ્યું પાસ થવા માટે મારે 35 માર્ક્સની જરૂર છે હું મેટ્રિકની પ્રિલિમિનરી પરીક્ષામાં 20,20 માર્ક્સના  બે જ સવાલ ના જવાબ લખી પેપર છોડીને ચાલ્યો આવીશ અને ગેરંટીથી 40 માંથી મારા 35 ,માર્ક્સ આવી જશે
ત્યાં બેઠેલા વિદ્યાર્થીઓ બધા હસ્યાં અને કહ્યું પણ ખરું "યાર, ફેંકવામાં તો કંઈક વ્યાજબી રાખ "
મૂછ વિનાના પ્રવિણે મૂછ ઉપર આંગળી ફેરવતા કહ્યું " તો હવે આ વખતે જોઈ લ્યો, ઈ ક્યાં આઘે છે ?'
પ્રિલિમિનરી પરીક્ષા આવી. ગણિતનો પેપર હતો પ્રવિણે 20 20 માર્ક્સના બે દાખલ ગણી, પેપર અધૂરું મૂકી ક્લાસ રૂમ છોડી ચાલી નીકળ્યો ,
દશેક દિવસ પછી પરિણામ આવ્યું પ્રવિણના  ગણિતમાં  40/40 માર્ક્સ આવ્યા
એવી રીતે મેટ્રિકની વાર્ષિક પરીક્ષા આવી
ગણિતનો પેપર હતો
પેપરના મથાળે સૂચના હતી
(1) નીચે આપેલ પ્રશ્નોમાંથી કોઈ પણ પાંચ પ્રશ્નો ના જવાબ આપો.
(2) દરેક પ્રશ્નોના સરખા ગુણ છે.
પેપરમાં કુલ સાત પ્રશ્નો પુછાયેલા એમાંથી કોઈ પણ પાંચ ના જવાબ લખવાના હતા.
પ્રવિણે સાતે સાત પ્રશ્નો ના જવાબ આપી પેપરના મથાળે સૂચના લખી
સૂચના :- કોઈ પણ પાંચ પ્રશ્નના ઉત્તરો તપાસો "
પરિણામ આવ્યું પ્રવિણના ગણિતમાં 100/100 માર્ક્સ આવ્યા
****
જતે દિવસે B.Sc.પાસ કરી ચોરવાડની સીરામીક ઇન્ડસ્ટ્રીઝમાં કેમિસ્ટ તરીકે નોકરીની શરૂઆત કરી.
  થોડા વખત પછી એ છોડી મોરબી ખાતે પરશુરામ પોટરીઝમાં જોડાયા,ફરી અભ્યાસ શરૂ કરી M.Sc. ઉચ્ચ ગુણાંક સાથે પાસ કર્યું વળી નોકરી છોડી અને મોરબીની લખધીરસિંહજી એન્જીનીયરીંગ કોલેજમાં લેક્ચરર તરીકે, ત્યાર બાદ દીર્ઘકાળ સુધી ભાવનગર પોલિટેક્નિક કોલેજમાં પ્રોફેસર તરીકે અને છેલ્લે એલ.ડી. એન્જીનીયરીંગ કોલેજમાં રસાયણશાસ્ત્રના વિભાગીય વડા તરીકે નિવૃત થયા.
એ વિદ્યાર્થી અવસ્થાનો પ્રવિણ  જતે દિવસે પ્રોફેસર પ્રવિણરાય ઝાલા તરીકે ઓળખાતા થયા